၀၅၃။ စူရာ နဂျမ်း ကြယ်တာယာ ကဏ္ဍ
( မက္ကာမြို့တော်ကျ- ၆၂ အာယသ်တော်)
မပြတ်မစဲ သနားကြင်နာ ညှာတာတော်မူသော မဟာကရုဏာတော်ရှင် ဖြစ်တော်မူသော အလ္လာဟ်အရှင်မြတ်၏ နာမံတော်ဖြင့် အစပြုပါ၏။
၀၅၃း ၁။ (ငါအရှင်မြတ်သည်) ကြယ်တာရာကို သက်သေထူတော်မူ၏။ အကြင်အခါဝယ် ထိုကြယ်တာရာသည် ကွယ်ပျောက်၍သွားလေ၏။
၀၅၃း ၂။ အသင်တို့၏အဖော် (တမန်တော်မြတ် မုဟမ္မဒ်) သည် လမ်းလွဲနေသည်လည်း မဟုတ်ပေ။ လမ်းမှားကို လိုက်ခဲ့သည်လည်း မဟုတ်ပေ။
၀၅၃း ၃။ ထိုမှတစ်ပါး ထိုအဖော် (တမန်တော်မြတ် မုဟမ်္မဒ်)သည် (မိမိ) စိတ်အလိုဆန္ဒအရ စကားပြောဆိုလေ့ရှိသည်လည်း မဟုတ်ပေ။ 
၀၅၃း ၄။ ယင်းပြောဆိုမှုကား (အလ္လာဟ်အရှင်မြတ် အထံတော်မှ) ထုတ်ပြန်ခြင်း ခံရလေသော ထုတ်ပြန်ချက် သာလျှင်ဖြစ်ပေသည်။ 
၀၅၃း ၅။ (အသင်တို့၏) ထိုအဖော်အား အလွန်အားအင် ကြီးမားသူ (ကောင်းကင်တမန်)သည် သင်ကြားပို့ချ ၍ ပေးခဲ့လေ၏။ 
၀၅၃း ၆။ စွမ်းအင်နှင့်ပြည့်စုံသူဖြစ်သော လွန်စွာလှပ တင့်တယ်သူဖြစ်သော၊ ထို့နောက် ထို(ကောင်းကင်တမန်)သည် နဂိုမူလ ရုပ်သဏ္ဌာန်နှင့် အထင်အရှား ပေါ်လာခဲ့၏။
၀၅၃း ၇။ ထိုစဉ်အခါဝယ် ထို(ကောင်းကင်တမန်)သည် မြင့်စွင့်လှစွာသော မိုးကုပ်စက်ဝိုင်း၌ ရှိနေခဲ့၏။ 
၀၅၃း ၈။ ထို့နောက် ထို(ကောင်းကင်တမန်)သည် ချဉ်းကပ်၍ လာခဲ့၏။ ထို့နောက်တစ်ဖန် ထပ်မံ၍ ချဉ်းကပ်ခဲ့ပေရာ၊
၀၅၃း ၉။ လေးနှစ်ပြန်မျှသာ ဝေးကွာလေတော့၏။ စင်စစ် ထို့ထက်ပင် ပို၍ နီးကပ်စွာ ရှိခဲ့လေ၏။ 
၀၅၃း ၁၀။ ထိုအခါ ထိုအရှင်မြတ်သည် မိမိ၏ ကျွန် (မုဟမ္မဒ်)ထံသို့ မိမိထုတ်ပြန်(လိုသော)ထုတ်ပြန်ချက်များကို ထုတ်ပြန်တော်မူခဲ့လေ၏။ 
၀၅၃း ၁၁။ (ထိုအသင်တို့အဖော်၏) စိတ်နှလုံးသည် တွေ့မြင်ခဲ့သော အရာများနှင့်စပ်လျဉ်း၍ မှားယွင်းခြင်း မရှိခဲ့ပေ။ 
၀၅၃း ၁၂။ သို့ပါလျက် အသင်တို့သည် ထိုအဖော်နှင့် ၎င်းတွေ့မြင်ခဲ့သောအရာများတွင် အငြင်းအခုံ ပြုနေကြ လေသလော။ 
၀၅၃း ၁၃။ ထိုမှတစ်ပါး ထိုအဖော်သည် ထို(ကောင်းကင်တမန်)အား ဒုတိယအကြိမ် ဆင်းသက်ရာ၌ မုချဧကန် တွေ့မြင်ခဲ့၏။ 
၀၅၃း ၁၄။ နယ်စွန်နယ်ဖျား၌ရှိသော ဆီးပင် “စစ်ဒ်ရတုလ် မွန်တဟာ” ဆီးပင်၏အနီးတွင်၊ 
၀၅၃း ၁၅။ ယင်းဆီးပင်၏ အနီး၌ပင် “ဂျန္နတုလ်မအ်ဝါ” သုခဘုံ ရှိ၏။ 
၀၅၃း ၁၆။ အကြင်အခါဝယ် ဆီးပင်ကို ဖုံးလွှမ်းလျက် ရှိသောအရာများသည် ဖုံးလွှမ်းလျက်ရှိ၏။ 
၀၅၃း ၁၇။ (ထိုအဖော်၏) မျက်စိသည် သွေချော်ခဲ့သည် လည်းမရှိချေ။ ကျော်လွန်သွားခဲ့သည်လည်း မရှိချေ။ 
၀၅၃း ၁၈။ ဧကန်မလွဲ ထိုအဖော်သည် ၎င်းအား ဖန်ဆင်း မွေးမြူတော်မူသော အရှင်မြတ်၏ ကြီးကျယ်လှစွာသော သက်သေလက္ခဏာတော်များကို တွေ့မြင်ခဲ့သည်မှာ အမှန်ပေတည်း။
၀၅၃း ၁၉။ သို့ဖြစ်ပေရာ အသင်တို့သည် လားတ် နှင့် စပ်လျဉ်း၍လည်းကောင်း၊ အွဇ္ဇာ နှင့်စပ်လျဉ်း၍လည်း ကောင်း၊ 
၀၅၃း ၂၀။ အခြား တတိယမြောက်ဖြစ်သော မနားတ် နှင့် စပ်လျဉ်း၍လည်းကောင်း၊ ဆင်ခြင်သုံးသပ်ခြင်းကို ပြုခဲ့ကြလေသလော။ 
၀၅၃း ၂၁။ အသင်တို့၌ သားယောက်ျားကလေးများ ရှိကြ၍ ထိုအရှင်မြတ်၌ သမီးမိန်းကလေးများ ရှိကြလေ သလော။ 
၀၅၃း ၂၂။ ဤသည်ကားလွန်စွာမမျှတသောခွဲဝေမှုပင်၊ 
၀၅၃း ၂၃။ ယင်း(ဆိုခဲ့ပြီးသော ရုပ်တု)တို့မှာ အသင်တို့ ကိုယ်တိုင်သည်လည်းကောင်း၊ အသင်တို့၏ အဘ၊ ဘိုးဘေးတို့သည်လည်းကောင်း၊ မှည့်ခေါ်ထားသော အမည်နာမများသာလျှင် ဖြစ်ကြကုန်၏။ အလ္လာဟ် အရှင်မြတ်သည် ယင်းတို့(ကိုကိုးကွယ်ရန်)နှင့် စပ်လျဉ်း ၍ မည်သည့်သက်သေသာဓက တစ်စုံတစ်ရာကိုမျှပင် ချပေးတော်မူခဲ့သည် မဟုတ်ပေ။ ထိုသူတို့ကား ရမ်းဆ ထင်မြင်ချက်နှင့် စိတ်အလိုဆန္ဒ များကိုသာလျှင် လိုက်နာလျက် ရှိကြကုန်၏။ အမှန်မှာ ၎င်းတို့ထံသို့ ၎င်းတို့၏အရှင်ထံမှ အမှန်တရားသည် ရောက်ရှိလာခဲ့ချေပြီ။
၀၅၃း ၂၄။ မနုဿ လူသား၌ ၎င်းအာသာဆန္ဒရှိသမျှ ရရှိလေသလော။ 
၀၅၃း ၂၅။ စင်စစ်မှာကား တမလွန်ဘ၀သည် လည်းကောင်း၊ လောကီဘ၀သည်လည်းကောင်း၊ အလ္လာဟ်အရှင်မြတ်(၏ လက်တော်တွင်း) ၌သာရှိ၏။ 
၀၅၃း ၂၆။ စင်စစ်သော်ကား မိုးကောင်းကင်များ၌ မြောက်မြားစွာသော ကောင်းကင်တမန်တို့သည် ရှိကြကုန်၏။ (သို့ရာတွင်) ၎င်းတို့၏ ကြားဝင်အသနားခံပေးမှုသည်ပင် အလ္လာဟ်အရှင်မြတ်က မိမိအလိုရှိတော်မူ၍ ကျေနပ်တော်မူသောသူနှင့် ပတ်သက်၍ ခွင့်ပြုတော် မူပြီး နောက်မှသာလျှင် အသုံးဝင်နိုင်အံ့သတည်း။
၀၅၃း ၂၇။ ဧကန်စင်စစ် အာခိရတ် တမလွန်ကို မယုံကြည်သောသူတို့သည် မလာအိကဟ် ကောင်းကင်တမန်တို့အား မိန်းမများ၏ အမည်နာမများဖြင့် မှည့်ခေါ်ကြကုန်၏။
၀၅၃း ၂၈။ စင်စစ်သော်ကား ဤသည်နှင့်စပ်လျဉ်း၍ ၎င်းတို့၌ မည်သည့် သက်သေ အထောက်အထား အသိပညာမျှ မရှိပြီ။ ၎င်းတို့သည် ရမ်းဆထင်မြင်မှုကိုသာ လျှင်လိုက်နာကြကုန်၏။ သို့ရာတွင် ရမ်းဆ ထင်မြင် မှုမှာ အမှန်တရားနှင့် ယှဉ်ပြိုင်၍ လုံးဝ အသုံးဝင်သည် မဟုတ်ပေ။
၀၅၃း ၂၉။ သို့ဖြစ်ပေရာ (အို-နဗီတမန်တော်၊) အသင်သည် အကြင်သူတို့အား လျစ်လျူရှု၍ နေပါလေ။ ထိုသူတို့သည် ငါအရှင်မြတ်၏ ဆုံးမသြ၀ါဒတော်မှ မျက်နှာလွှဲ၍ နေခဲ့ကြကုန်၏။ ထိုမှတစ်ပါး ၎င်းတို့သည် လောကီဘ၀မှတစ်ပါး အခြား တစ်စုံတစ်ရာကို ရည်ရွယ်ကြသည် မဟုတ်ပေ။
၀၅၃း ၃၀။ ဤသည် ၎င်းတို့၏ အမြင့်ဆုံးသော အသိပညာပင်။ ဧကန်မလွဲ အသင့်အား ဖန်ဆင်းမွေးမြူ တော်မူသော အရှင်မြတ်သည်ပင်လျှင် ထိုအရှင်မြတ်၏လမ်းမှ လွဲချော်သူအား အသိတော်မူဆုံး ဖြစ်တော်မူ၏။ ထိုမှတစ်ပါး ထိုအရှင်မြတ်သည်သာလျှင် တရားလမ်းရရှိသော သူအား အသိတော်မူဆုံး ဖြစ်တော်မူပေသတည်း။
၀၅၃း ၃၁။ ထိုမှတစ်ပါး မိုးကောင်းကင်များ၌ ရှိသမျှတို့ သည်လည်းကောင်း၊ ပထ၀ီမြေ၌ရှိသမျှတို့သည်လည်းကောင်း၊ အလ္လာဟ်အရှင်မြတ် ပိုင်ဆိုင်တော်မူသော အရာများသာလျှင် ဖြစ်ကြကုန်၏။ နောက်ဆုံးတွင် ထိုအရှင်မြတ်သည် ဒုစရိုက်မှုကို ကျူးလွန်ခဲ့ကြသော သူတို့အား ၎င်းတို့ကျူးလွန်ခဲ့ကြသည်၏ အကျိုးကို ပေးတော်မူအံ့၊ ထိုနည်းတူစွာ ထိုအရှင်မြတ်သည် ကောင်းမှု ပြုခဲ့ကြသောသူတို့အား ကောင်းမြတ်သော အကျိုးကို ပေးတော်မူအံ့။
၀၅၃း ၃၂။ (ထိုကောင်းမှုပြုသူတို့မှာ) အသေးအဖွဲပြစ်မှုများကို (မတော်တဆ) ပြုမိကြသော်လည်း ကြီးလေးသောပြစ်မှုတို့မှလည်းကောင်း၊ ညစ်ညမ်းမှုတို့မှလည်းကောင်း၊ (အထူး)ကြဉ်ရှောင်ကြကုန်၏။ ဧကန်မလွဲ အသင့်အား ဖန်ဆင်းမွေးမြူတော်မူသောအရှင်မြတ်သည် ကျယ်ဝန်းလှစွာသော လွတ်ငြိမ်း ချမ်းသာခွင့်ကို ပိုင်ဆိုင် တော်မူသော အရှင်မြတ်ဖြစ်တော်မူ၏။ ထိုအရှင်မြတ်သည် အသင်တို့အား မြေဖြင့် ဖန်ဆင်း တော်မူခဲ့စဉ်အခါ၌ အသင်တို့အား ကောင်းစွာ သိရှိတော်မူ၏။ အသင်တို့သည် မိမိတို့၏ မိခင်များ၏ ၀မ်းဗိုက်များတွင် သန္ဓေတည်စ ကလေးဘ၀၌ရှိခဲ့စဉ် အခါ၌လည်း အသင်တို့အား ကောင်းစွာ သိရှိတော်မူ၏။ သို့ဖြစ်ပေရာ အသင်တို့သည် မိမိတို့ကိုယ်ကို မိမိတို့ မြင့်မြတ်သည် စင်ကြယ် သန့်ရှင်းသည်ဟု မထင်ကြကုန်လင့်၊ ထိုအရှင်မြတ်သည်သာလျှင် ပြစ်မှု ဒုစရိုက်တို့မှ ကြဉ်ရှောင်ကြကုန်သော သူတို့အား အသိ တော်မူဆုံး ဖြစ်တော် မူပေ သတည်း။
၀၅၃း ၃၃။ (အို-နဗီတမန်တော်)၊ အသင်သည် အကြင်သူအား မမြင်ခဲ့လေသလော။ ထိုသူသည် မျက်နှာလွှဲ သွားခဲ့၏။ 
၀၅၃း ၃၄။ ၎င်းပြင် ထိုသူသည် အနည်းငယ်မျှ (ပစ်္စည်း) ကိုပေး၍ (ယခု) ပိတ်ပင်ခဲ့၏။ 
၀၅၃း ၃၅။ ၎င်း၏ထံတွင် အကွယ်၌ရှိသည်ကို သိစွမ်းနိုင်သော အသိပညာရှိနေသောကြောင့် ၎င်းသည် တွေ့မြင် လေသလော။ 
၀၅၃း ၃၆။ ၎င်းသည် မူစာ ၏ ကျမ်းများ၌ လာရှိသည်ကိုလည်းကောင်း၊ 
၀၅၃း ၃၇။ (အမိန့်တော်များကို) ကျေပွန်စွာဆောင်ရွက်ခဲ့သော အီဗ်ရာဟီမ် ၏ကျမ်းတော်များ၌ လာရှိသည်ကို လည်းကောင်း၊ သတင်းပေးခြင်း မခံခဲ့ရလေသလော။ 
၀၅၃း ၃၈။ ဧကန်စင်စစ် မည်သည့်သယ်ပိုးသူ တစ်ဦးတစ်ယောက်မျှပင် သူတစ်ပါး၏၀န်ထုပ်ကို သယ်ပိုးရွက်ဆောင်မည် မဟုတ်ဟူ၍လည်းကောင်း။ 
၀၅၃း ၃၉။ ဧကန်မလွဲ မနုဿလူသား၌ ၎င်း၏ကြိုးပမ်း ဆောင်ရွက်ချက်သာလျှင် ရှိမည်ဟူ၍လည်းကောင်း၊
၀၅၃း ၄၀။ မုချဧကန် ထိုမနုဿလူသား၏ ကြိုးပမ်းဆောင်ရွက်ချက်မှာ မကြာမြင့်မီပင် တွေ့မြင်ရမည်ဟူ၍ လည်းကောင်း၊
၀၅၃း ၄၁။ ထို့နောက် ထိုမနုဿ လူသားသည် ယင်း ကြိုးပမ်းမှုနှင့်စပ်လျဉ်း၍ လွန်စွာပြည့်စုံသော အစား ပေးခြင်းကို ခံရမည်ဟူ၍ လည်းကောင်း၊ (သတင်းပေး ခြင်း မခံခဲ့ရလေသလော)။ 
၀၅၃း ၄၂။ ၎င်းပြင် (အို-နဗီတမန်တော်၊) ဧကန်အမှန် လမ်းဆုံးမှာ အသင့်အား ဖန်ဆင်းမွေးမြူတော်မူသော အရှင်မြတ်အထံတော်၌ဖြစ်သည်ဟူ၍လည်းကောင်း၊ 
၀၅၃း ၄၃။ စင်စစ်ဧကန် ထိုအရှင်မြတ်သည်ပင် ရယ်စေ တော်မူသည်၊ ငိုကြွေးစေတော်မူသည်ဟူ၍လည်းကောင်း၊ 
၀၅၃း ၄၄။ ထိုအရှင်မြတ်သည် မချွတ်မလွဲ သေစေတော်မူ သည်၊ ရှင်စေတော်မူသည်ဟူ၍လည်းကောင်း၊ 
၀၅၃း ၄၅။ ဧကန်စင်စစ် ထိုအရှင်မြတ်သည်ပင် ဖိုနှင့်မ နှစ်မျိုးနှစ်စားလုံးကို ဖန်ဆင်းတော်မူခဲ့သည် ဟူ၍ လည်းကောင်း၊ 
၀၅၃း ၄၆။ ကလလရေကြည်ဖြင့်၊ ယင်းကလလရေကြည်သည် သွန်းလောင်းခြင်းခံရသောအခါ၊ 
၀၅၃း ၄၇။ ထိုမှတစ်ပါး မုချစင်စစ် ဒုတိယအကြိမ် ဖန်ဆင်းမှုသည် ထိုအရှင်မြတ်၏တာဝန်ပင် ဖြစ်သည်ဟူ၍ လည်းကောင်း၊ 
၀၅၃း ၄၈။ အမှန်ဧကန် ထိုအရှင်မြတ်သည် ကုံလုံကြွယ်ဝ စေတော်မူသည်၊ ဆင်းရဲနွမ်းပါးစေ-ဥစ္စာပစ္စည်း ချီးမြှင့်ပေးသနား တည်မြဲစေတော်မူသည်ဟူ၍ လည်း ကောင်း၊ 
၀၅၃း ၄၉။ အမှန်စင်စစ် ထိုအရှင်မြတ်သည်ပင် ရှစ်အ်ရာ (လုဒ္ဒက)ကြယ်ကို ဖန်ဆင်းတော်မူသော အရှင်မြတ်ဖြစ်တော်မူသည် ဟူ၍လည်းကောင်း၊
၀၅၃း ၅၀။ မလွဲဧကန်ထိုအရှင်မြတ်သည်ပင် ပထမ အာဒ် အမျိုးသားတို့အား ဖျက်ဆီးတော်မူခဲ့သည်ဟူ၍ လည်းကောင်း၊ 
၀၅၃း ၅၁။ (ထိုအရှင်မြတ်သည်ပင်) ဆမူဒ် အမျိုးသား တို့အားလည်း (ဖျက်ဆီးတော်မူခဲ့ပေရာ) တစ်ဦး တစ်ယောက်ကိုမျှ ခြွင်းချန်တော်မူခဲ့သည် မဟုတ်ပေ။ 
၀၅၃း ၅၂။ ထိုနည်းတူစွာ ရှေးအထက်ကျော်ကာလ၌ နူဟ် ၏အမျိုးသားတို့အားလည်း (ဖျက်ဆီးတော်မူခဲ့ ၏)။ ဧကန်စင်စစ် ထို နူဟ် ၏ အမျိုးသားတို့မှာ ပိုမို၍ပင် မတရားသောသူများ၊ ပိုမို၍ပင် ဆိုးသွမ်း သူများ ဖြစ်ခဲ့ကြကုန်၏။ 
၀၅၃း ၅၃။ ထိုမှတစ်ပါး ထိုအရှင်မြတ်သည်ပင် ထက်အောက် ပြောင်းပြန်လှန်ပြီးဖြစ်သော ရွာများကိုလည်း ကိုင်ပေါက်တော်မူခဲ့၏။ 
၀၅၃း ၅၄။ ထို့နောက် ယင်းရွာများကို ၀န်းဝိုင်း ဖုံးလွှမ်းခဲ့ သောအရာသည် ၀န်းဝိုင်း ဖုံးလွှမ်းခဲ့၏။ 
၀၅၃း ၅၅။ သို့ဖြစ်ပေရာ (အို-ကြားနာသူ၊) အသင်သည် အသင့်အား ဖန်ဆင်းမွေးမြူတော်မူသော အရှင်မြတ်၏ မည်သည့် ကျေးဇူးတော်များနှင့် စပ်လျဉ်း၍ ဒွိဟ သံသယဖြစ်လျက် ရှိသည်နည်း။ 
၀၅၃း ၅၆။ ဤ(တမန်တော်)သည် ရှေးဟောင်း သတိပေး နှိုးဆော်သူတို့တွင် တစ်ပါးအပါအ၀င်ဖြစ်၏။ 
၀၅၃း ၅၇။ နီးကပ်၍လာသောအရာသည် နီးကပ်၍လာခဲ့လေပြီ။ 
၀၅၃း ၅၈။ ထိုနီးကပ်၍လာသောအရာကို အလ္လာဟ်အရှင်မြတ်မှတစ်ပါး ဖယ်ရှားအံ့သောသူဟူ၍ အလျင်းမရှိပြီ။
၀၅၃း ၊၅၉။ အသင်တို့သည် ဤအာယတ်တော်ကြောင့် အံ့သြ၍ နေကြလေသလော။ 
၀၅၃း ၆၀။ ထို့ပြင် အသင်တို့သည် ငိုကြွေးခြင်းမရှိကြသည့်ပြင် ရယ်မော၍ နေကြလေသလော။ 
၀၅၃း ၆၁။ ထိုမှတစ်ပါး အသင်တို့သည် ဂရုမစိုက်ဘဲ ကစားခုန်စား မာန်မာနထောင်လွှားလျက် ရှိကြလေ သလော။ 
၀၅၃း ၆၂။ သို့ဖြစ်ပေရာ အသင်တို့သည် အလ္လာဟ်အရှင် မြတ် ရှေ့တော်မှောက်ဝယ် စဂ်ျဒဟ် ပျပ်ဝပ်ဦးချကြလေကုန်။ ထိုမှတစ်ပါး အသင်တို့သည် (ထိုအရှင် မြတ်အားသာလျှင်) ကိုးကွယ်ကြလေကုန်။
No comments:
Post a Comment